ꑋꆳꁏꇁꃀꉙꇁꄿꑟ，ꁧꄩꎯꂚꃧꃨꅿꉗꌑꐩꀕꇁꃲ，ꇉꄩꇪꀮꂾꃚꐝꄧꀕꇁꃲ。ꃅꑌꀉꐔꂃꏂꂃꆧꄻꌊꃀꉙꇁꄿꇢ，ꃀꉙꇁꄿꂃꏂꂃꆧꈚꇁꈜꀕꋽ，ꀋꇊꆏꀉꐔꊰꏁꈓꂷꊈꇁꌐꅍꑮꑟꁧꌠꌡ。ꑋꅐꑋꈌꁏ、ꑋꈌꉙꏦꀕꄮꇬ，ꃀꉙꇁꄿꇁꌊꆫꄓꂿꄑꄮꇬꑟꌠꉬꅊꇈ。ꏣꃀꏣꑟꈧꌠꑌ，ꌩꈪꇁꄉꄌꌊꍯꃅꅔꃅꑟ，ꃄꂿꉐꊨꆹꌠꉬꑴꄷ；ꃤꃀꅅꃅꄌꌊꁦꀑꁧꄩꑟ，ꌩꏓꒉꇸꆹꌠꉬꑴꄷ。

ꎷꆳꁏꇁꃀꉙꇁꄿꑟ，ꇉꈫꇁꄿꒊꃀꒈꌺꐝꍠꀕꇁꃲ，ꌩꏪꇓꏪꉌꊭꉌꇓꎓꁨꀕꇁꃲ。ꑳꄩꃅꇴꃴꑐꀕꌠꁖꄮꇬ，ꆺꑳꀉꂿꍣꋚꑕꄲꑞꈨꃅꐺꑌꀋꐚ；ꌩꑭꁯꎓꑵꃚꎓꁨꀕꌠꂿꄮꇬ，ꆀꃅꀉꐔꈍꑋꀿꇁꃀꉂꌦꀋꐚ。ꃀꉙꇁꄿꃅꎸꃹꇁꈭꐨꆏ，ꄔꊒꄔꈩꌒꄮꑟ。ꌣꈚꑿꅰꊒꑌꈜꀕꌒ，ꆿꍯꂷꌵꊒꑌꈜꀕꌒ。ꌠꆗꑮꆜꈧꌠꑌ，ꌳꃈꌳꈄꅪꎔꅪꃨꋍꂷꇈꋍꂷ，ꉌꈯꑓꈜꑵꉙꈍꎞꋍꊱꇈꋍꊱ。

ꍴꆳꁏꇁꃀꉙꇁꄿꑟ，ꌩꏾꇓꏾꏁꇅꁤꇅꁏꌠꊰꇁꃲ，ꌩꋚꇓꂷꏁꃅꏁꀱꀕꌠꂔꇁꃲ。ꌞꊿꄹꇬꍴꊂꌕꆪꉂꏣꈜꀕꎴꑵꉬꑴꄷ。ꁧꎔꇉꎔꌠꌺꃘꉘꐯꁧꇆ，ꉢꉌꐡꑓꇗꌠꉙꇐꑍꊱꁱꇁꆏꁳꇬ，ꆏꇁꇫꀘꑲꌧꀕꀋꐚ。ꒉꎔꃪꎔꌠꃀꉙꒊꃀꇆ，ꉢꉂꑟꎵꑳꀕꌠꉌꌒꑘꀕꑍꊱꉙꇁꆎꇰꇬ，ꆏꇁꇫꅲꑲꌧꀕꀋꐚ。ꍴꅐꍴꈌꁏ、ꍴꈌꏂꆙꀕꄮꇬ，ꃀꉙꇁꄿꇁꌊꋚꎳꒉꎳꄮꇬꑟ。ꈾꂷꇵꊫꒊꌠꀋꃷꎵ，ꍯꂷꐍꊭꀕꌠꀋꃷꎵ。ꋚꂂꒉꎔꃀꉙꇁꄿꎔ，ꃀꉙꇁꄿꋠꂊꈚꊸꇀꎂꀕ。

ꋅꆳꁏꇁꃀꉙꇁꄿꑟ，ꑳꉎꁧꇁꇈꌺꃰꈉꐍꎭꀕꌠꎍꇁꃲ，ꑳꐮꁬꃨꆰꃨꐻꎵꊪꏮꀕꌠꐯꇁꃲ。ꍆꀕꋬꂻꈌꏑꑠꑵꉬꑴꄷ，ꃰꊿꋬꂻꈎꏅꃮꀠꌉꑵꉬꑴꄷ。ꃀꉙꇁꄿꋆꃹꈭꐨꆏ，ꒈꀑꐥꌠꒈꂪꉜꄉꇁ，ꁭꅐꐥꌠꁮꐚꉜꄉꇁ，ꉬꇮꀱꇁꆺꑳꏂꃴꈎꏅꇁꅊꇈ。ꋅꊂꌕꆪꃀꉙꇁꄿꆹ，ꆀꃅꊿꀘꇁꅊꇈ，ꀉꁌꀋꁧꒌꆠꀘꌊꋪꀕꁍꃴꎭ，ꑱꈐꑱꑭꊿꇬꋬꂻꇀꎂꀕ；ꑮꑟꅪꏷꇁꅊꇈ，ꀉꐔꎔꀕꑮꌊꊈꇁꌐꅍꎭ，ꆺꑳꏂꃴꑌꑿꀻꎆꇀꎂꀕ。

ꉂꇁꅉꌠꃀꉙꇁꄿꇆ，ꉡꆹꃅꈎꃅꆪꐊꄉꆎꉂꇁ，ꃅꑍꃅꉖꐊꄉꆏꎺꇁ；ꉘꁮꈞꆈꃹꒉꆎꉂꇁ；ꆧꏮꁧꎏꅐꇁꆏꎺꇁ；ꆀꃅꇕꈌꐥꑌꆎꉂꇁ，ꉷꃅꇓꈓꐥꑌꆏꎺꇁ。ꃀꉙꇁꄿꉂꏣꊷꆣꀕ。